Suportado ni Education Secretary Sonny Angara iti panangipawil ti panagusar ti social media dagiti menor de edad, ngem saan a rumbeng a karaman iti restriksiyon dagiti application a napateg iti panagadal ken iti dadduma pay a napateg a pakausaran.
Segun kenni Angara, mabalin a maipatungpal iti sapasap a panangipawil ti social media para kadagiti ubbing, bayat a mapalubosan met dagiti application a maus-usar iti panagadal.
Kasaruno daytoy iti panangilungalong ti gobyerno iti mas nair-irut nga addang tapno maprotektaran dagiti agad-adal, nangruna iti tengnga dagiti mailislista nga insidente ti kinaranggas iti uneg ti pagadalan.
Maipalagip nga inaprubaran ti Senado idi Huwebes, Oktubre 8, iti maikatlo ken maudi a panagbasa iti gakat a mangipawil iti panagusar ti social media dagiti ubbing ken agtutubo nga awan pay edad a 18-anyos.
Babaen ti botos a 16-1-0, naipasa ti Senate Bill No. 2424 wenno Safe Media Access and Responsible Technology for Kids in Digital Spaces (SMART KIDS) Act.
Bayat nga idi Lunes, Oktubre 12, 2026 nga impasa met ti Kamara iti maikatlo ken maudi a panagbasa iti bersiyon da a House Bill No. 11566 wenno Safe and Friendly Environment for Kids in Digital Spaces (SAFE Kids) Act wenno maaw-awagan pay kas Children’s Digital Safety, Protection, and Well-Being Act. Nakagun-od daytoy ti 287 a botos a pabor, tallo a kontra, ken awan ti abstention.
Iti sidong ti nasao a gakat, maipawil dagiti ubbing nga agtawen ti 13 agpababa, nga ag-create, agpa-rehistro, agusar iti social media account ken online gaming platforms nga addaan ti interactive features.
Iti gakat ti Kamara, dagiti agtawen ti 13 agingga 17-anyos ket mapalubosan da nga agusar ngem kasapolan ti parental consent. Malimitaran ti exposure da iti algorithm ti short-video feeds, awan sarday nga scrolling, targeted advertising, livestreaming, ken feature nga addaan kapadpada a peligro iti panagsugal.
