Awan ti nagbaliwan ti presyo dagiti balde, timba, ken dadduma pay a container iti merkado, iti tengnga ti panawagan ti administrasyon nga agurnong ti danum kadagiti balde, kas panagsagana iti epekto ti El Niño.
Daytoy ti impasigurado ni Mr. Noel M. De Guzman, maysa a manager iti houseware ditoy siyudad ti San Fernando, La Union.
Iti interview ti Bombo Radyo La Union kenni de Guzman, pattien na a makatulong iti imbaga ti Presidente nangruna kadagiti ordinaryo nga umili ken pamilya nga addaan iti limitado a pinansiyal a kabaelan.
Maipalagip nga inallokoy ni Presidente Ferdinand “Bongbong” Marcos Jr. iti publiko nga agbalin a wais iti panagusar ken panagurnong ti danum tapno masaganaan iti panagkurang ti supply ti danum iti panawen ti tikag wenno strong El NiÑo.
Siniguro pay ni Presidente kadagiti umili a mangipaay ti gobyerno iti arwaten a pang-filter ken mangisayangkat ti demonstrasyon nu kasatnu nga aramiden a nadalus ken natalged nga usaren dagiti maurnong a danum.
Segun kenni De Guzman, iti panagusar ti timba wenno balde ket praktikal a wagas para iti kaadwan a Pilipino.
Imbinglay na pay ti presyo dagiti balde ken container a mabalin a pagurnongan ti danum.
Kinuna na a ti presyo dagiti container a produkto ti Orocan ket mangrugi ti presyo a P149 agingga P289.00 depende iti kadakkel (size) dagitoy.
