Pinaglibakan ni sigud a Bangsamoro Transition Authority Parliament Member Sultan Edrieza Rimbang ti maipagarup a pannakairamanna iti napaay a pannakaipatulod ti nasurok a ₱3 bilion a gatad ti shabu equipment nga aggapu kuma sadiay Laos ken maiyeg idiay Mindanao.
Iti social media account-na, nagpanawagan ni Rimbang iti gobierno ti naan-anay nga imbestigasyon mainaig ti nasao a banag gapu ta mairamramanen ti pamiliana maipapan iti isyu.
Impaganetget ni Rimbang a saan a pudno ti alegasion a mainaig isuna iti nadakamat a kargamento ken illegal a droga.
Kinunana pay a kontakenna dagiti abogadona tapno makaaramidda iti maitutop a legal nga aksyon ken tapnu madalusan ti naganna.
Idi napan a lawas, binigbig ni Interior Secretary Jonvic Remulla ni Rimbang a maysa a politiko manipud Mindanao a mapapati a karaman iti smuggling operation ken kas financier.
Segun kenni Remulla, asawa ni Rimbang ni Princess Rohaniah Rimbang, a kabsat ti asawa ni Alias ”Fahad” a naarestar iti maysa nga airport sadiay Laos.
Kabayatanna, nangipaulog metten ti Department of the Interior and Local Government (DILG) iti subpoena kadagiti 11 a tattao a mainaig iti nasao a kaso.
Saan pay a nangiruar ti Malacañang ken sumagmamano nga ahensia ti gobierno iti statement mainaig iti nasao a banag.
