Nangisayangkat ti Department of National Defense (DND) ti imbestigasyon mainaig iti insidente sadiay Lipa, Batangas, a nakatayan ti uppat a piloto ti Philippine Air Force (PAF).
Pinasingkedan ti PAF nga uppat a piloto ti natay idi Biernes, kalpasan a nairaman ti dua nga eroplano nga SF-260 iti aviation accident bayat ti panangisayangkatda iti training flight.
Nupay kasta, kinuna ti PAF a saanda a mapasingkedan no adda aktual a panagdinnungpar iti nagbaetan ti dua nga eroplano.
Kabayatanna, nangipadanon met ti DND ti pannakiladingit kadagiti pamilia ken ay-ayaten dagiti pimmusay a piloto babaen ti statement nga inruarda idi napan a lawas.
Impaganetget pay ti departamento nga agtalinaed daytoy a nakaikumit iti transparency, pagsungsungbatan, ken panangsigurado iti kinatalged dagiti personnels bayat nga agtultuloy ti imbestigasion iti nasao nga insidente.
