Nangiwaras dagiti ready-to-eat food box ken mainom a danum iti Department of Social Welfare and Development (DSWD) kadagiti nagbakwit a residente idiay Albay idi Biyernes ti malem, Oktubre 30, kasaruno ti nailista a moderately explosive eruption ti Bulkang Mayon.
Segun iti DSWD, nakaisagana da dagiti 417,886 family food packs, 14,137 ready-to-eat food boxes, ken 28,366 pack ti non-food items para kadagiti maapektaran ti panagbettak ti bulkan.
Kasaruno daitoy ti pammilin dagiti lokal a gobierno ti Camalig, Malilipot ken Tabaco City a mangisayangkat ti mandatory evacuation kadagiti residente nga agnanaed iti uneg ti innem a kilometro ti Permanent Danger Zone (PDZ), kagiddan met iti panangipangato ti Alert Level 3 ti Bulkang Mayon.
Imbilin metten ti DSWD iti Social Welfare and Development (SWAD) Team ken Disaster Response Management Division daitoy ti panangisayangkat ti profiling kadagiti residente a nagbakwit tapnu maamwan dagiti kasapulan da.
Kabayatanna, nasuspendir met dagiti klase kadagiti apektado a lugar.
