Nakumpiskar ti Bureau of Customs (BOC), kabinnulig ti Philippine Drug Enforcement Agency (PDEA) ken NAIA Inter-Agency Drug Interdiction Task Group (NAIA-IADITG), ti pakabuklan a 24.8 a kilo ti mapapati a marijuana kush nga aggatad iti P24.79 milyon iti dua a nagsina nga operasyon sadiay NAIA Terminal 3.
Iti operasyon idi Oktubre 29, 2026, naaresto ti maysa nga Amerikano a pasahero a demteng iti airport manipud iti Bangkok, Thailand, kalpasan a makumpiskar kenkuana ti 15 a pakete ti mapapati a marijuana kush nga addaan ti timbang a 17,464 gramo ken aggatad ti P17.46 milyon. Nakadulin dagiti nasao a kush iti uneg ti pakete ti makan.
Nadiskubre iti nasao a kontrabando kalpasan a makitaan ti mapagduaduaan nga imahe dagiti bagahe ti suspek babaen iti X-ray screening ken nagpositibo iti K9 inspection.
Tallo nga aldaw sakbay iti daytoy, nakumpiskar met dagiti awtoridad ti 7,335 a gramo ti mapapati a marijuana nga aggatad iti P7.33 milyon manipud iti abandonado a bagahe a manipud met laeng iti Bangkok.
