LA UNION – Nasurok kumurang a 70 a tattao iti na-stranded iti tengnga ti Amburayan River idiay Barangay Pula, Tagudin, Ilocos Sur idi rabii ti Huwebes.
Imbaga iti Bombo Radyo La Union ni Pol. Captain Edgardo Baldonadi, agdama a deputy chief-of-police idiay Sudipen Police Station, a dagiti nasao nga indibiduwal ket nagturong da iti tengnga ti Amburayan River a maysa nga isla, tapno mapan agala ti abal-abal.
Segun kenni Baldonadi maibasar metten iti istorya dagiti nasao nga indibiduwal, idi dumanon ti alas 9:30 ti rabii, nag-panic dagitoy idi kellaat a dimmackel ti danum iti karayan, isunga nagpa-rescue dagitoy iti Sudipen PNP.
Dagus met a nagresponde dagiti otoridad, kadwa da iti BFP ken MDRRMC tapno mangisayangkat da ti search and rescue operation.
Na-rescue dagiti nasao nga indibiduwal babaen iti panangilugan iti rescue boat ken rakit ken natalged a naka-awid dagitoy.
Kadagiti 70 a na-stranded, innem kadakuada iti taga-Sudipen ket natalged a naka-awid da idiay Barangay Ipet ti nasao nga ili.
Innayon pay ni Baldonadi, a posible a danum ti tudo a naggapo iti kabantayan ti makagapo iti panagdackel ti danum iti nasao a karayan.
