BR LA UNION – Iggemen dagiti otoridad ti car agent ken asawa na a persons of interest iti kaso a pammapatay iti maysa a babae a pulis ken anak na.
Kinuna ni National Capital Region Police Office chief Police Major General Anthony Aberin, ti asawa ti car agent ket maysa a dismissed a pulis.
Naisayangkat ti panangaresto kadagiti suspek idiay Quezon City itay parbangon ti Sabado, Enero 31.
Maipagarop nga isuda ti matudtudo a suspek a nangpapatay kenni Police Senior Master Sergeant Diane Marie Mollenido, 38-anyos ken anak na a ni John Ysmael, agtawen ti walo (8).
Immuna a nasarakan ti bangkay ti babae a pulis iti maysa a creek idiay Pulilan, Bulacan idi Enero 24 nga adda tama ti paltog iti ulo na.
Kalpasan ti innem nga aldaw, nasarakan met ti anak na iti maysa a calamansi farm idiay Victoria, Tarlac.
Binigbig ti ama ti biktima a ni Police Senior Master Sergeant John Mollenido iti bangkay ti 8-anyos nga anak na.
Naudi a nakita iti ag-ina idi Enero 16 ken naipadamag a mapukpukaw idi Enero 19.
Maibasar iti inisyal a report, nakatuding a maki-sinnarak dagiti biktima iti maysa a car agent idiay Quezon City kalpasan a nakailako ti lugan.
Nakakita dagiti imbestigador ti sumagmamano nga ebidensiya, kas ti tedted ti dara iti balay ti suspek idiay Quezon City.
