LA UNION – Impaganetget ti Commission on Elections (Comelec) idi kalman, Domingo a mabalin a maidatagan ti kaso nga election-related offense ni suspended Bamban Mayor Alice Guo kalpasan a nag-match ti fingerprints da iti Chinese passport holder a ni Guo Hua Ping.
Segun kenni Comelec chairman George Garcia, mabalin a mangidatag ti poll body iti kaso a “motu proprio” kontra kenni Guo.
Maibasar iti Certificate of Candidacy (COC) ni Guo idi nagpa-ibotos kas mayor idiay ili ti Bamban, Tarlac idi 2022 elections, pinirmaan na iti maysa a waragawag nga isuna ket maysa nga umili a Pilipino, ken saan a permanent resident wenno immigrant ti sabali a pagilian.
Kinuni Garcia, mabalin a sumango ni Guo iti election offense nga addaan ti kaibatugan a tallo agingga lima a tawen a pannakaibalud.
Kagiddan daytoy, mabalin pay a maidatagan ti kaso a perjury wenno kaso a falsification agsipudta nagulbod iti maysa a sinapataan na a dokumento.
