LA UNION – Rinespondian dagiti kameng ti Santol Police Station iti maysa a report ti maipagarop a panagpakamatay idiay Sitio Topinao, Barangay Lettac Sur, Santol, La Union, alas syete ti bigat idi Domingo, Hunyo 16, 2024.
Iti biktima ket 17-anyos, estudyante, tubo ti Sitio Lusong, Cabugao, Ilocos Sur ngem agdama nga agnanaed iti balay ti uliteg na idiay ili ti Santol.
Maibasar ti inisyal nga imbestigasyon, agarop alas sais ti bigat idi naduktalan ti kasinsin ti biktima, a nagbekkel daytoy iti likod ti balay da babaen ti kurdon ti sapatos.
Inturong dagiti nagresponde a pulis iti biktima idiay Santol Primary Care Facility ngem indeklara nga Dead on Arrival ti attending physician.
Natay iti biktima babaen ti Asphyxia by self-strangulation through hanging.
Naipadamag ti uliteg ti biktima nga addaan ti problema daytoy iti pamilya nga isu’t makagapo nu apay nga agnanaed pay laeng daytoy iti balay na.
Kabayatanna, awan met ti nakita a foul play iti insidente, ngem adda nasarakan dagiti pulis a suicide note iti uneg ti maysa a bote ket nakasurat ditoy iti… “Sorry my little sister, you tell to grandmother, bring me to Cabugao, Ilocos Sur.”
