LA UNION – Naisayangkat idi kalman, Hunyo 16, iti Turn Over and Oath Taking Ceremony dagiti baro a nabotosan nga opisyal ti La Union idi May 9 elections, idiay Diego Silang Hall, Provincial Capitol ti La Union.
Iti sango ni outgoing Governor Francisco Emmanuel ‘Pacoy’ Ortega III, nagsapata ni Governor-elect Raphaelle Veronica ‘Rafy’ Ortega-David ken Vice-Governor Mario Eduardo Ortega.
Dagiti nagsapata a lima a board members para iti umuna a distrito ti La Union ket isuda:
- Maria Rosario Eufrosina P. Nisce, 2. Joy R. Ortega, 3. Gerard G. Ostrea, 4. Jennifer C. Mosuela-Fernandez, ken 5. Rachel N. Pinzon
Para iti maikadwa a distrito ti La Union;
- Maria Annabelle S. De Guzman, 2. Henry B. Balbin, 3. Cynthia Angelica M. Bacurnay, 4. Ruperto A. Rillera, Jr., ken 5. Victor I. Rivera.
Ni Governor-elect Rafy iti kaubingan ken kaunaan a babai a gobernadora ti La Union.
Sukatan na iti ama na a ni Governor Pacoy Ortega, a nagserbi iti uneg ti innem a tawen.
Iti panagbetla ni Governor Rafy, kinuna na a nakasaganan daytoy nga agserbi iti La Union ken ipakat na dagiti baro nga abilidad ken wagas na iti panangitandudo dagiti programa, a mangidur-as iti sapasap a probinsiya.
Kabayatanna, iti met panagbetla ni outgoing Gov. Pacoy, pinagyamanan na iti amin a nangipaay ti suporta ken talek kabayatan iti panagtakem na kas ama ti probinsiya.
Kasaruno daytoy iti naisayangkat a turnover ceremony babaen iti panangiyawat ken panangitalek ni Governor Pacoy iti amin a dokumento iti sumaruno a liderato.
Iti baro a set dagiti opisyal ti La Union ket pormal nga agtugaw ken mangrugi iti trabaho inton Hunyo 30, 2022 kas sagudayen iti linteg.
