LA UNION – Iyaw-awis ti Bureau of Fisheries and Acquatic Resources Region-I kadagiti amin a kwalipikado nga estudyante nga agkalkalikagom a mangala ti kurso a Fisheries a saan nga agpang-dua-dua nga agturong iti opisina da tapno agparehistro ken agbalin nga scholar iti sidong ti Fisheries Scholarship Program.
Iti pannakiuman ti Bombo Radyo La Union ken Ms. May Ann L. Maningding, Community Development Officer I ti Regional Fisheries Scholarship Program Coordinator, inlawlawagna a ti Fisheries Scholarship Program ket maysa kadagiti programa ti Bureau of Fisheries and Acquatic Resources a mangipaay ti full scholarship para kadagiti kwalipikado nga estudyante, nangruna dagiti annak dagiti mangalap.
Ti Fisheries Scholarship Program ket addaan ti tallo a componentL: umuna, ti Fisheries Industry Leader Grant (FILG) para kadagiti Senior high school graduates ken graduating students nga addaan ti Honors; maikadwa, ket ti Fisherfolk Children Educational Grant (FCEG) para met laeng kadagiti Senior high school graduates ken graduating students nga nga annak dagiti mangalap; ken ti maikatlo ket ti Indigenous Cultural Communities/Indigenous Peoples (FSP-ICCs/IPs) a para kadagiti marigrigat nga estudyante wenno karaman iti maysa a tribu.
Inpakaammo na a ti scholarship ket saklawen na ti free tuition fee, 5,000 pesos monthly allowance, 2,000 pesos book allowance iti kada semestre, on-the-job training wenno summer fee a 3,000 pesos, thesis allowance a 7,000 pesos ken addaan da pay ti graduation allowance a 1,500 pesos.
Innayon pay ni Maningding nga apaman a makagraduar dagiti estudyante nga addaan ti honor ket adda pay ipaay ti ahensya, no sadinno a kadagiti aggraduar a Suma Cumlaude ket mabalin da a makaala ti 50,000 pesos, Magna Cumlaude 30,000 ken no Cum Laude ket 20,000 pesos nga aggapo amin iti Bureau of Fisheries and Acquatic Resources.
Malaksid pay kadagitoy ket naruay pay dagiti idiaya ti ahensya no sadinno ket isuda ti prayoridad ti ahensya.
Immuna iti daytoy ket naammuan a ti programa ket nabayagen a maidi-diaya kadagiti estudyante sipud pay idi tawen 1979 no sadinno a ti nagan pay laeng ti programa idi ket Ferdinand E. Marcos Scholarship Program for Fisheries a nasukatan laeng idi 2010.
