Ngimmato iti 458 ti bilang dagiti barangay a naapektaran iti African Swine Fever.
Katupag daytoy ti panagngato iti 82% no idilig iti sigud a bilang ti Bureau of Animal Industry idi rugrugi daytoy a bulan.
Maibasar iti datos ti Bureau of Animal Industry, nairekord dagiti kastoy a kaso kadagiti barangay iti 32 a probinsia manipud iti dandani amin a rehion iti Pilipinas.
Nangatngato daytoy no idilig iti nairekord a 251 a barangay manipud iti 22 a probinsia iti umuna a lawas ti Agosto.
Segun kenni Agriculture Assistant Secretary for Poultry and Swine Dante Palabrica, namnamaenda latta nga umadu ti nadakamat a bilang gapu ta panawenen ti panagtutudo.
Maysa kadagiti rason nga itudo ni Palabrica ti panagadu ti kaso ti ASF ket dagiti awan prinsipiona a negosiante a mangibiahe latta iti karne ti baboy a mabalin a naapektaran iti sakit.
Maipalagip a maysa kadagiti dua a pork truck a nagturong idiay Metro Manila a sinabat dagiti kameng ti Bureau of Animal Industry ti nagpositibo iti ASF.
