LA UNION – Maysa a buryas a naidum-duma iti langa na iti impasngay ti maysa a takong idiay Barangay Anonang Menor, Cauayan, Ilocos Sur.
Naklaat ti pamilya Carasi idi makita da iti maysa a naisang-sangayan a buryas manipud iti siyam nga anak ti taraken da a takong wenno baboy.
Iti nasao a buryas ket pinanaganan da ti ‘CYCLOPS’ agsipudta maymaysa laeng iti mata na ngem dackel nga adda iti tengnga ti muging na, kumpleto met ti lapayag na, ngem naidumduma pay iti bibig na nga inyarig ti akin-taraken iti ngiwat ti lames a tilapia.
Iti interview ti Bombo Radyo La Union kenni Ms. Engracia Magsambol-Carasi, maysa a teacher idiay ili ti Sta. Catalina ken residente ti Barangay Anonang Menor, Caoayan, Ilocos Sur istorya na nga inibbatan ti anak na idi makita na iti naisang-sangayan a langa ti buryas gaputa nagbuteng.
Imbaga ni Carasi, a kas maysa a Science Teacher ken maibasar iti panagsukimat na, posible a ni CYCLOPS ket resulta ti maaw-awagan a genetic abnormality wenno genetic disorder.
Kinuna met iti sumagmamano a nataengan, daytoy ket posible a gapu metten iti kina-baket ti takong agsipudta daytoyen ti maika-pito a daras a panaganak iti taraken da a fattener, segun kenni Carasi.
Iti agdama, agtaltalinaed a nasalun-at ken naparagsit iti baboy nga agtawen ti tallo nga aldaw, agsipudta naiyanak idi Marso 16, 2024.
