LA UNION – Inlawlawag ni Atty. Reddy Ceralde Balarbar, agdama nga Assistant Regional Election Director ken Acting City Election Officer ditoy siyudad ti San Fernando, dagiti wagas wenno elemento para iti umno a panangidatag ti kaso partikular ti panaglabsing iti Omnibus Election Code a vote buying.

Iti eksklusibo nga interview ti Bombo Radyo La Union kenni Atty. Balarbar, kinunana a kasapolan iti nalawag nga ebidensiya a kas koma iti video footage ken affidavit manipud iti tao nga immawat iti kuwarta wenno anya pay a banag nga inted ti maysa a kandidato.

Segun kenni Atty. Balarbar a dagitoy ket napateg nga elemento, tapno agpursige iti reklamo wenno kaso a maidatag iti opisina ti Commission on Election (COMELEC) wenno iti piskalya ken dumalan amin iti due process.

Kinunana pay a dua a kaso iti mabalin a maidatag kontra iti maysa a kandidato nu maipapan iti vote buying.

Kabilang iti violation ti Omnibus Election Code ken disqualification case.

Impalawag pay ni Atty. Balarbar nu apay a nasaknap iti kaso a vote buying ken nu apay a masansan a ma-dismiss daytoy.

Kinunana a kurang iti suporta kas koma iti presensiya dagiti complainant inton mangrugi iti imbestigasyon, isunga masansan a maibasura dagiti kaso.

Segun kenni Atty. Balarbar, napateg iti presensiya dagiti agrek-reklamo manipud rugi agingga a mapatawan ti maiyannatop a pannusa iti naglabsing a kandidato.