LA UNION – Protektado iti gobyerno ti Singapore dagiti foreign workers a pakairamanan dagiti Overseas Filipinos.
Daytoy iti impanakkel iti barbaro a Bombo International News Correspondent (BINC) ti Bombo Radyo La Union a ni Mr. Rico Ruiz Frias, tubo ti Montalban, RIzal, ngem nakabase ita idiay Central Area, Singapore.
Kinuna na a malaksid a compensated dagiti mangmangged sadiay a pakairamanan dagiti foreign domestic workers, nasay-sayaat pay iti trato wenno pannakilangen dagiti employers kadagiti workers, nga agtrab-trabaho a naimbag ken ammo da iti pagrebbengan dagitoy.
Ni Frias, 48-anyos, taga-Montalban, Rizal ket agtrab-trabaho kas Architecture Coordinator iti maysa a construction company idiay Singapore.
Kinuna na a 16 a tawenen nga agtrab-trabaho iti nasao a pagilian ken mamitlo agingga mamin-uppat a daras nga agawid ditoy Pilipinas nangruna idi awan pay ti pandemya.
Nakatuding a makisinnarak ni President Ferdinand ‘Bongbong’ Marcos Jr. iti Filipino Community idiay Singapore kagiddan iti state visit na iti nasao a pagilian inton Setyembre 6 agingga Setyembre 7.
Daytoy ket nairanta tapno papigsaen iti relasyon nangruna iti panaggayyem ken kalakalan iti dua a pagilian.
Manamnama a maisayangkat iti pannakitaripnong ti Presidente iti filipino community, babaen iti Philippine Embassy sadiay, inton Setyembre 6 idiay University Cultural Centre Ho Bee Auditorium idiay National University Singapore.
