LA UNION – Sinuspinden ti Philippine Atmospheric, Geophysical and Astronomical Services Administration (PAGASA) iti panangiruar na ti inaldaw a heat index report.
Inyanunsiyo daytoy ti state weather bureau idi kalman, Hunyo 18, kalpasan a bimmaban iti mapas-pasaran a heat index levels kadagiti lugar kasaruno ti panag-serrek ti tiyempo ti panagtutudo.
Inlawlawag ti PAGASA, a nangrugi idi kalman, June 18, saan dan a mangiyisyu ti heat index information agsipudta kaadwan a lugar ditoy pagilian ket makapad-padas itan ti panagtudtudo ken panaggarru-od.
Segun iti PAGASA, isubli da ti daily heat index monitoring inton Marso uno, 2025.
Iti kangatuan nga heat index a nailista ti PAGASA ita a tawen ket 55°C idiay Guiuan, Eastern Samar, idi May 26 ken May 28.
