BR LA UNION – Limbesen iti 3,000 a tattao iti nailista a natay iti timmama a magnitude 7.7 a gingined idiay Myanmar iti tengnga ti agtultuloy a panagsapol dagiti rescuer kadagiti narsuod a pasdek.
Segun iti Embahada ti Myanmar idiay Japan, umaboten ti 3,003 dagiti natay iti nasao a gingined bayat nga aganay 4,515 iti nailista a nasugatan ken 351 iti agtultuloy a masap-sapol.
Pagdan-danagan ita iti isay-sayangkat a relief efforts iti posible a panagtudo kalpasan nga imballaag dagiti weather officials a mabalin a makapadas mangrugi inton Domingo agingga Abril 11, iti panagtudo dagiti lugar a nakaru a tinamaan ti gingined kas idiay Mandalay, Sagaing ken iti kabisera ti Naypyidaw.
Inpadamag pay ti Embahada nga addan ti 53 airlifts ti naipaay a tulong iti Myanmar bayat a nasurok 1,900 a rescue workers iti simmangpeten manipud iti 15 a pagilian, pakaibilangan dagiti kaarruba a pagilian iti Southeast Asia kas ti Pilipinas, China, India, ken Russia.
Kabayatanna, idiay Thailand a tinamaan met laeng ti napigsa a gingined, agtultuloy iti panagsapol kadagiti survivors manipud kadagiti debris iti narsuod a 30-storey a pasdek nga under construction, idiay Bangkok.
Agus-usar dagiti rescuer idiay Thailand ti mechanical diggers ken bulldozers tapno dadaelen dagiti 100 tonelada a konkreto tapno marekober dagiti survivor.
Nangibati ti gingined idiay Thailand iti pakabuklan a 22 a tattao a natay ken 72 a mapukpukaw.
