LA UNION – Kinumpirma ti Department of Health (DOH) ita nga aldaw ti Martes, a nakastreken ditoy pagilian iti FLiRT variants ti COVID-19.
Segun kenni DOH Assistant Secretary Albert Domingo, maibasar daytoy iti latest sequencing data ti University of the Philippines – Philippine Genome Center (UP-PGC).
Nupay kasta kunana, agtaltalinaed a low risk iti virus iti amin a rehiyon ditoy Pilipinas.
Base iti datos nga imbinglay ti DOH, nakailista ti Pilipinas ti dua a kaso ti KP.2, a kabilang iti maaw-awagan a FLiRT variants.
Maipagarop nga adda pay nailista da a 30 a kaso ti JN.1 ken dua a kaso ti JN.1.18, idi bulan ti Mayo.
Segun kenni Domingo, iti kasapaan a sample collection date para iti KP.2 ditoy pagilian ket nailista idi Mayo 2024.
Aminado ni Domingo a posible nga adda dagiti KP.2 cases nga immunan a naiolista ngem gapu iti limitado a sequencing ket saan a dagus a na-detect dagitoy.
Adda iti uppat a variants under monitoring (VUM), a pakaibilangan iti JN.1.7, JN.1.18, KP.2 ken KP.3 nga agpapada a descendants ti JN.1, a maysa a variant of interest a responsable iti panagngato ti kaso ti impeksiyon iti umuna a paset ti tawen 2024.
