Nairekord ti Department of Health (DOH) ti kanayonan a bilang dagiti holiday road mishaps bayat nga agtultuloy ti panangmonitor ti ahensia iti nakaam-amak a panagngato ti daitoy a bilang.
Iti agdama, immadu dagiti kastoy nga insidente iti kabaruan nga 18 a kaso manipud Disiembre 22 agingga iti Enero 5.
Iti dagupna, dimmanon iti 656 ti bilang dagiti aksidente, nga ad-adu iti 32.7% ngem idi napan a tawen.
Maibasar iti datos, 569 ti naduktalan a saan nga agus-usar iti aniaman a safety accessories kas iti helmet, idinto a 123 a motorista ti naduktalan a nakainum ti arak.
Manipud iti daytoy a bilang, 468 ti nakairamanan dagiti motorsiklo wenno scooter.
Kabayatanna, saan met a nakigtot ni Health Secretary Teodoro Herbosa iti resulta daytoy a bilang ngem imbilangna a ‘bad news’ gapu metten kadagiti pito a natay iti kastoy nga aksidente.
