BR LA UNION – Kinumpirma ti Department of Health (DOH) a saan pay a naan-anay a nalawag nu sadino ti nakaiturongan iti dakkel a paset ti ₱89.9 bilyon a balor ti PhilHealth excess fund nga insubli ti gobiyerno iti National Treasury idi tawen 2024.
Maysa daytoy kadagiti impaganetget ti DOH iti naisayangkat a panagdengngeg idiay Kongreso.
Iti budget briefing idiay Kamara, imbaga ni Health Secretary Teodoro Herbosa a nasurok-kumurang ₱30 bilyon manipud iti pakabuklan a kantidad ti pondo iti nausar a pagbayad iti health emergency allowance dagiti health workers ditoy pagilian.
Innayonna pay, ti nasao a panagbayad ket pang-pullat iti sigud a deficit nga umabot iti nasurok ₱27 bilyon.
Ngem paset ti pondo ke pinagbayad iti benepisyo dagiti health workers.
Nupay kasta, saan da a masiguro nu anya iti eksakto a naka-usaran iti nabatbati a pondo manipud ti ₱89.9 bilyon.
Iti laeng ahensya ti gobyerno nga akin-iggem ti kumpleto a detalye seknan iti lokasyon ti nasao a pondo ket iti Department of Finance (DOF).
Isunga limitado iti impormasyon a maibinglay ti DOH seknan iti nasao a banag.
Gaputi dayta, agtultuloy nga umap-apela ni Herbosa iti Department of Finance nga ikkan prayoridad ti panangilatang ti pondo para kadagiti proyekto ken programa a makatulong iti panangpasayaat ti health care system ditoy Pilipinas.
Nu imandar kunana ti Korte Suprema nga isubli ti pondo iti PhilHealth, imbaga ti sekretaryo a plano ti ahensya nga usaren daytoy tapno papigsaen iti implementasyon ti Universal Health Care (UHC) law.
Maysa daytoy a kari ti Department of Health iti publiko.
