LA UNION – Natay iti maysa a 17-anyos nga estudyante manipud Baguio City kalpasan a nalmes iti kabaybayan a sakop ti Barangay Samara, Aringay, La Union.
Iti biktima ket nabigbig a ni Brandon Cassey Dunglay Nalica, residente ti Loakan, Itogon, Benguet.
Iti interview ti Bombo Radyo La Union kenni PCapt. Carlos Mamitag, deputy chief-of-police ti Aringay Police Station, kinuna na a naaddaan ti salu-salo wenno family reunion iti pamilya ti biktima, idiay Samara Beach.
Sakbay a napasamak ti insidente, impakada ti lola ti biktima iti ama na idiay Baguio City, nga agbi-beach dagitoy.
Kinuna met ni Mamitag, a saan da a nagkurang ti palagip kadagiti beach cottage owners ken kadagiti beachgoers, a saan pay a tumapog iti kabaybayan, ngem maipagarop a saan a nalapdan iti biktima kadwa ti maysa a kasinsinna a nagdigos iti baybay.
Segun kenni Mamitag, posible nga ingguyod ti napigsa a dalluyon ti baybay iti agkasinsin ket suwerte a nakalasat ti maysa agsipudta ammo na ti aglangoy idinto a saan nga ammo ni Brandon.
Napasamak ti insidente agarop ala 1:45 idi malem kalman, Agosto 5, ken narekober iti bangkay babaen kadagiti nagresponde a pulis, PCG personnel, Maritime, MDRRMO, ken lumugar agarop alas 7:01 idi rabii.
Naiturong pay ti biktima iti kaasetgan a pagagasan ngem naideklara a natayen.
Manipud pagagasan, naiturong iti bangkay iti maysa a punerarya idiay Aringay sakbay a maiyawid idiay Baguio City.
