LA UNION – Nakarwar iti pagbaludan a Becora Prison idiay Dili, Timor Leste ni sigud a Negros Oriental Rep. Arnolfo “Arnie” Teves Jr. ita laeng a malem, Hunyo 10, 2024.
Daytoy iti linaun ti mensahe nga impatulod iti abogado ni Teves a ni Atty. Ferdinand Topacio kadagiti kameng ti media.
Saan metten a nangipaay ti kanayunan a detalye ni Topacio, ngem imbaga na a mangiruar ti opisyal a waragawag ita a rabii.
Maipalagip a Marso 21 idi imbaga ti Department of Justice (DOJ) nga inaresto dagiti otoridad ni Teves bayat ti panagay-ayam na ti golf idiay Timor Leste.
Daytoy ket kalpasan nga impasidong isuna ti International Criminal Police Organization (Interpol) iti red notice system ken kinanselar pay ti Manila Trial Court iti pasaporte na.
Napatakyas ni Teves idiay House of Representatives gapu iti masansan a panagabsent na iti sesyon, malaksid a nakaswan ti kaso a pammapatay gaputi napasamak a Pamplona massacre idi 2023 a nakatayan ni Negros Oriental Governor Roel Degamo ken siyam pay a tattao.
