LA UNION – Kinumpirma ti Department of Justice a nalpasen idi napan a lawas iti extradition trial kontra kenni sigud a Negros Oriental Representative Arnolfo “Arnie” Teves Jr. idiay Timor Leste.
Segun iti ahensya, impaayan ti korte ti agsumbangir a partido ti naan-anay nga oras tapno makapag sumite ti bukod a posisyon ken argumento.
Agsumite nga umuna iti Timor Leste Central Authority ti maiyannatop a Position Paper ken sumaruno iti kampo ti sigud a mammanday linteg.
Lima nga aldaw iti inted a pawayway ti korte tapno makabuken ken makaiyetnag ti desisyon.
Namnamaen ti DOJ nga iruar ti korte idiay Timor Leste iti desisyon na agingga iti maudi a paset ti agdama a bulan.
Ni Teves ti matudtudo nga utek iti pannakapapatay ni Negros Oriental Gov. Roel Degamo ken siyam pay a dadduma idi Marso 2023.
Sumangsango pay ti sigud a mammanday linteg iti agtutuon a kaso a pammapatay a napasamak idi 2019.
