LA UNION – Gagem ti selebrasyon ti Earth Day nga addaan ti Tema a “Planet VS. Plastic” a pagtalinaeden nga asul ti globo ken malabanan ti climate change a mapaspasaran.
Daytoy ti inrakurak ni Mr. Miguel Vargas – Board of Director ti Philippine Nurses Association-La Union Chapter bayat ti panangrambak ti Earth Day idi kalman, Abril 22, 2024.
Segun ken Vargas dakkel a banag ti pananglimitar ti panagusar ti plastic iti aglawlaw gapu ta no saan a malimitaran ken agtultuloy ti panagusar ti plastic ditoy pagilyan ket mabalin a mangitunda ti pannakadadael saan laeng nga iti aglalaw, pakairamananen ti salun-at.
Inpalgak pay ni Vargas a saanen nga umanay pay ti 3Rs wenno Reduce, Reuse, Recycle, no sadinno a masapul pay nga imula iti panunot ti panag-Refuse ken Repurpose.
Innayonna a gapu iti climate change ket mapaspasaran pay ti nangatu a temperatura wenno ti nangato a heat index.
Gapu iti daytoy ket gutgotigoten na ti publiko nga agmula ti kayo, liklikan ti panagusar ti plastic, iyaplikar ti 5Rs ken agbalin a modelo para kadagiti sumaruno a henerasyon.
Kabayatanna, inpakammo ni Vargas a babaen ti panangmentinir ti kinatalged ken kinadalus ti aglawlaw ket nangiwayat ti nagduduma nga ahensya ti gobierno iti Oplan Dalus ken Clean Up Drive.
