LA UNION – Aminado ni Nestor Bautista, labor foreman iti General Services Office ditoy siyudad, nga iti kangrunaan a parikot iti night market, ket iti kaawan ti nakalukat a comfort room iti rabii, isunga adda dagiti insidente a panagisbo kadagiti sul-suli iti old market ditoy siyudad.
Gaputi dayta, kasapolan a parbangon pay laeng ket aramiden dan iti flashing wenno panangsibog ti danum iti aglawlaw ti old market, tapno dalusan dagiti isbo ken rugit nga imbati dagiti tattao kabayatan ti night market.
Kabayatanna, nakiddaw iti pannakitinnulong ken kooperasyon dagiti amin nga umili ken bisita nga agtur-turong ditoy siyudad ti San Fernando nangruna ita a semana santa, kangrunaan na iti maipat-patungpal nga ordinansa nga adda pakainaigan na iti anti-littering wenno saan a panagiwara.
Impaganetget ni Bautista, a napinpintas ken nadal-dalus pay iti lugar nu adda iti disiplina ti tunggal maysa.
Segun kenni Bautista, ikag-kagumaan da a pagtalinaeden a nadalus iti aglawlaw, ngem adda met iti tattao a saan na nga ammo iti agusar kadagiti naimuntar a basuraan.
