LA UNION – Milyon a dolyar itan ti napukaw wenno danyos gaputi nalawa a wildfire idiay Hawaii, a naka-apektaran ti tallo nga isla partikular idiay Maui ken Lanai.
Iti interview ti Bombo Radyo La Union kenni Bombo International News Correspondent Paul John Marcos Castillo, native ti Bacnotan, La Union nga itan ket agtrabtrabaho ken agad-adal idiay Hawaii, kinuna na nga umaboten ti 36 dagiti natay kaadwan ket nataengan idiay Lahaina.
Kaadwan a residente iti nasao a lugar ket nauram ken na-suffocate ti asok kalpasan a naabutan dagitoy ti wildfire.
Inladawanna pay ti Maui, a kadackelan a tourist destination idiay Hawaii, a “devastated” kalpasan iti nalawa a perdisyon a ginubway ti wildfire.
Segun kenni Castillo, arigna a dimmapo ti dackel a paset ti Maui, partikular idiay Lahaina, a maibilang a napnuan pakasaritaan a lugar agsipudta daytoy ti sigud a kapital ti Hawaiian Kingdom, sakbay nga inukopar wenno pormal a tinagikua ken nagbalin a maika-50 nga estado ti Amerika idi Agosto 21, 1959.
Imbatad na, a nauram dagiti babbalay, lug-lugan, ken naduma-duma nga establisimento gapwanan ti wildfire.
Innayon pay ni Castillo nga adu kadagiti residente ken umili idiay isla ti Maui iti saan da a naantisiparan iti panagsaknap ti apoy, isunga adda dagiti indibiduwal a ti nakakawes laeng kadakuada ti imet da idi pimmanaw dagitoy iti pagtrab-trabahuan da.
Kinuna na nga agserbi koma nga adal iti mapas-pasamak a didigra idiay Hawaii, tapno nakasagana a kanayon nu adda ti emerhensiya.
Iti agdama, nasurok 10 ribu a tattao iti immakar ken agtaltalinaed ita kadagiti community centers ken dackel a paset idiay Maui ken Lanai iti awanan pay laeng ti kuryente.
