LA UNION – Dinayyeg ti magnitude 5.1 a gingined iti probinsiya ti Ilocos Sur ken kabangibang a lugar idi malem kalman, base iti report ti
Philippine Institute of Volcanology and Seismology (Phivolcs).
Iti gingined a tectonic in origin ket nailista agarop alas-2:08 ti malem.
Nakita iti epicenter daytoy iti kaadayu a 63 kilometers, amianan-a-laud ti Candon City, ken aguneg ti 14 a kilometro.
Narikna met ti gingined iti kapigsa nga Intensity IV idiay Candon ken San Esteban, Ilocos Sur.
Intensity III iti narikna idiay Vigan City, Ilocos Sur; Pinili, Ilocos Norte; Sudipen ken Bangar ditoy La Union; Bolinao ken Alaminos City idiay Pangasinan.
Intensity II iti panagdayyeg a narikna idiay Sinait, Santa Cruz ken Santa Lucia, Ilocos Sur; Bacarra, Ilocos Norte; ken San Juan, La Union.
Awan met iti nailista ti Phivolcs a perdisyon kangrunaan na iti sanikua ngem namnamaen iti aftershocks.
