BR LA UNION – Mapatta-patta a ₱320,000 a gatad ti kuwarta ti maipagarop a na-holdup iti bodega ti J&T Express idiay Barangay Alcala, Luna, La Union idi rabii ti Agosto 21, 2026.
Maibasar iti inisyal a report ti Luna Municipal Police Station, agarup 9:59 ti rabii, nagresponde dagiti pulis iti naipadamag a robbery-hold-up iti nasao a lugar.
Tallo nga empleyado ti nasao a courier service provider, iti biktima ti insidente a pakairamanan ti 37-anyos a delivery rider, 25-anyos a babai nga administrative staff, ken 25-anyos a babai a finance and human resources personnel.
Maibasar iti imbestigasyon, mangisay-sayangkat dagiti biktima ti inventory ken accounting idi maipagarop a simmangpet ti dua a lallaki a nakamotorsiklo ken dagus a nagdeklara ti holdup.
Mapapati a pinaturongan ti paltog dagiti suspek dagiti biktima kasaruno ti panangala da ti agarup ₱320,000.
Kalpasan ti insidente, dagus a naglibas dagiti suspek a nakalugan ti motorsiklo, maipagarop a nagturong iti direksiyon ti ili a Balaoan ken nagtul-tuloy a nagturong iti abagatan a paset ti nasao a lugar.
Ti maysa a suspek ket nailadawan a nakasuot ti nangisit a pantalon, asul a long sleeve, nangisit a helmet ken naka-tsinelas, nakuttong ti bagi na ken mapattapatta nga agtayag ti 5’3″ agingga 5’5″.
Ti maikadwa a suspek ket nakasuot ti nangisit a pantalon ken long sleeve, nangisit a bonet ken naka-tsinelas, dakkel ti bagina ken mapattapatta a 5 feet ti katayag na.
Agtultuloy ti imbestigasyon dagiti otoridad iti napasamak a panagtakaw, panangsapol ken panangbigbig kadagiti suspek.
