LA UNION – Sinelebraran ti La Union Police Provincial Office (LUPPO) ti Araw ng Kagitingan nga indauluan ni PCol. Lambert A. Suerte.
Iti maika-82 nga Araw ng Kagitingan wenno Day of Valor ket naisayangkat babaen iti wreath laying ceremony iti United States Army Forces in the Philippines of Northern Luzon (USAFIP-NL) Military Shrine a nakabase idiay Brgy. Darigayos, Luna, La Union idi kalman, Abril 9, 2024.
Ti nasao nga aktibidad ket tinabunuan dagiti nangato ti ranggona nga opisyal manipud Police Regional Office 1 (PRO1) nga indauluan ni PBGen Lou F. Evangelista, PRO1 regional director, no sadinno a pinalakpakan da dagiti sakripisiyo dagiti amin a banuar gapu ta isuda ti agserbi a kas inspirasyon kadagiti agdama ken masanguanan a kaputotan.
Timmabuno pay iti nasao nga aktibidad da La Union Gov. Raphaelle Veronica Ortega-David, dagiti opisyal ti ili a Luna nga idauluan ni Bise Mayor Eduardo L Resurreccion; dagiti kameng ti Philippine Coast Guard ken Bureau of Fire Protection; Boys and Girl Scouts of the Philippines ; dagiti beterano; ken dadduma pay a sangaili.
Daytoy a selebrasyon ket tinawen nga ar-aramiden ti La Union PPO nangruna ti wreath laying ceremony iti USAFIP-NL Military Shrine, agraman ti gobierno probinsiyal ti La Union, munisipyo ti Luna, ken dadduma pay nga ahensia ti gobierno, tapno maikkan dayaw ti kinatured ken sakripisio dagiti banuar a nakiranget para iti waya-waya ti pagilyan.
Malaksid iti daytoy ket nangisayangkat pay ti La Union Provincial Health Office iti medical ken dental mission para kadagiti beterano a timmabuno iti nasao nga aktibidad.
