LA UNION – Nainget a nagpakdaar ti La Union Police Provincial Office (LUPPO) iti publiko mainaig iti peggad ken legal nga implikasion ti panagiwaras ti “fake news” wenno biddut nga impormasyon, nangruna iti social media.
Impaganetget dagiti otoridad nga iti panangparnuay ken panangibinglay ti fake news ket saan laeng nga iresponsable nga aramid no di ket nalawag a panaglabsing iti linteg.
Segun ti LUPPO, siasinoman a maduktalan nga agiwarwaras iti peke a damag ket mabalin a maidarum ti “Unlawful Use of Means of Publication and Unlawful Utterances” a linaon ti Article 154 ti Revised Penal Code.
Mainayon pay, mabalin met a maipaulog dagiti nadagdagsen a dusa kadagiti aglabsing iti sidong ti Cybercrime Prevention Act of 2012 (Republic Act No. 10175), partikular iti Section 4 ken Section 6.
Panggep ti pakdaar a mapagtalinaed ti urnos ken maliklikan iti aniaman a mangted ti buteng iti publiko.
Napateg ti responsable a panagusar ti teknolohia tapno masigurado nga umno laeng nga impormasyon ti dumanon iti publiko.
Inallukoyda dagiti netizens nga agbalin a kritikal kadagiti mabasada online ken paneknekan iti impormasion kadagiti lehitimo a source sakbay nga ibinglay.
Para iti report wenno impormasyon, mabalin a kontaken ti La Union Police Provincial Office iti hotlineda a 0977-844-4404 wenno i-follow ti official Facebook page.
Daytoy nga addang ket paset ti tarigagay ti Police Regional Office 1 (PRO 1) nga agbalin a “Mapagtalkan, ken Maasitgan, iti panangipaay ti napartak ken napudno a serbisio iti publiko. (Report by Bombo Alphea)
