LA UNION – Nangipaay iti La Union Police Provincial Office (LUPPO) kadagiti palagip ken suhestion para kadagiti agtagikua ti negosio tapno maliklikan iti panag-atake ken panagtakaw kadagiti establisimiento.
Iti naipaay nga Anti-Robbery Tips, napateg a mapagtalinaed ti nalawag a panagkita iti uneg ti establisimiento, saan a kalluban dagiti tawa babaen kadagiti dadakkel a poster wenno nangato nga estante tapno nalaka a makita dagiti aglabas ken dagiti pulis no adda ti agpatpatrolya iti uneg ti establisimiento.
Impaganetgetda pay iti kinapateg ti kaaddaan ti nasayaat a silaw iti aglawlaw ti negosio. Masapul a nalawag dagiti sumrekan, parking area, ken dagiti nasipnget a paset, lalo iti likudan a pagruaran. Mairekomenda ti panagusar ti motion-sensor lights kas kanayunan a proteksion.
Kabayatanna, al-allukuyen met ti LUPPO nga ikabil a nasayaat dagiti CCTV cameras. Nasaysayaat no maikabil dagiti high-definition cameras a katukad ti mata iti asideg dagiti entrance tapno nalawag a maala dagiti rupa dagiti sumrek. Masapul met a siguradoen nga mabalin iti recording system ken addaan ti backup kas ti cloud storage.
Babaen kadagitoy nga addang, namnamaen a mapapigsa iti seguridad dagiti pasdek negosio ken matulongan iti napartak a panangbigbig ken panangtiliw kadagiti posible nga agtakaw. (Report by Bombo Jordan)
