CACAPIAN, SAN JUAN – Aktibo a nakipaset dagiti personnel ti La Union Police Provincial Office (LUPPO) iti “Barangay at Kalinisan Day” (BARKADA) Project a naangay idiay Barangay Cacapian, San Juan, La Union, idi kalman Abril 16, 2026.
Daytoy a programa a clean-up drive ket indauluan ti Provincial Community Affairs and Development Unit (PCADU) babaen ti panangidaulo ni PCPT Vivina E. Tanacio, Asst. UC, ken babaen ti direkta a panangimaton ni PLTCOL Lawrence L. Ganuelas, Unit Commander ti PCADU.
Ti nasao nga aktibidad ket gannuat ti Department of the Interior and Local Government (DILG) – La Union. Ti panggepna ket tapno maitandudo ti “Bagong Bayanihan” para iti nadaldalus, nasalun-at, ken nataltalged a komunidad.
Malaksid iti polis, nakikadua pay iti panagdalus dagiti opisial ti Barangay Cacapian, personnel manipud iti Bureau of Fire Protection (BFP) San Juan, Philippine Coast Guard (PCG), ken dadduma pay nga ahensia ti gobierno.
Babaen ti programa ti BARKADA, maipaganetget ti responsibilidad iti aglawlaw ken sustainable waste management babaen ti linawas a panagdalus. Panggepna pay a paregtaen ti tunggal umili a makipaset iti pannakataginayon ti urnos iti aglawlaw. (Report by Bombo Alphea)
Photo Courtesy: La Union Police Provincial Office
