LA UNION – Kinumpirma ti Philippine Institute of Volcanology and Seismology (PHIVOLCS) iti sumagmamano nga earthquake hazards a timpuar kalpasan ti Magnitude 7 a gingined idiay probinsiya ti Abra ken Ilocos Sur.
Iti eksklusibo a pannakiuman ti Bombo Radyo La Union kenni Supervising Science Research Specialist and Geologist Jeffrey S. Perez, kinuna na a mangisay-sayangkat da iti assessment kadagiti nasao a lugar ket nakita da iti tallo nga earthquake hazards.
Pakaibilangan ditoy iti maaw-awagan a liquefaction, sand boils, ken landslide, a masansan a tumpuar nu napigsa iti timmama a gingined.
Segun kenni Perez, iti liquefaction ket gagangay a mapaspasamak iti asideg ti kabaybayan wenno asideg iti kadanuman kas iti swamp, bubon, road surface, ken uray kadagiti sirok ti babbalay ken buildings.
Inlawlawag pay ni Perez a saan a lumned dagiti babbalay ken pasdek nu adda iti liquefaction, ngem ketdi agirig wenno agsikig.
Impaganetget pay ni Perez a dagiti nakita a sand boils kadagiti nasao a lugar ket saan a bulkan nudiket manifestation daytoy iti kaadda ti liquefaction.
Inrekomenda na a kitaen a naimbag iti lugar wenno disso a pagipasdekan ti istruktura ken aramiden a natibker ti pundasyon iti anyaman a pasdek tapno agbalin a natalged nu adda iti gingined.
