BR LA UNION – Sinigurado ti Land Transportation Office (LTO) nga agtultuloy ti operasyon da kontra kadagiti pampubliko a lugan nga aglabsing iti Anti-Overloading Policy, kasaruno ti pammilin ni Department of Transportation (DOTr) Secretary Vince Dizon nga irutan ti kampanya nga “Anti-Sardinas” tapno maliklikan ti nalabes a linnetlet iti pampubliko a transportasyon.
Segun kenni LTO Executive Director Atty. Greg Pua, maipangruna ti nasao nga operasyon kadagiti kangrunaan a kalsada a pagdodopodupan dagiti pasahero kas koma idiay Commonwealth Avenue, Marcos Highway, ken España Boulevard.
Maimuntar iti special enforcement teams a mangtutok kadagiti pampasahero a jeep ken bus nga aglabsing iti allagaden.
Nagpalagip pay ni Pua kadagiti drayber a limitaran ti bilang dagiti pasahero tapno masiguro iti kinatalged ti amin.
Impaganetget ni Pua a malaksid iti multa, adda pay demerit points kadagiti aglabsing a mabalin nga agresulta iti pannakasuspinde ti lisensya.
Pinalagipan met ti LTO dagiti pasahero a liklikan ti aglugan iti napusek a lugan para iti bukod a kinatalged.
