LA UNION – Dead on the spot ti maysa a mannalon kalpasan a napalpaltogan iti namin-adu a daras bayat a mangmangan iti karinderia idiay Brgy. Camilo Osias idiay Balaoan, La Union itay agsapa.
Binigbig ti Balaoan Police Station ti biktima a ni Ernesto Orine, 47-anyos, addaan asawa, residente ti Brgy. Corro-oy idiay ili ti Santol.
Maibasar iti inisial a panagsukimat ti pulisia, naamuan a kadua ti biktima ti driver daytoy idi kellaat nga immasideg ti dua a nakamotorsiklo a gunmen kasaruno ti pammaltog kenkuana.
Nagsagrap ti biktima iti uppat a tama ti bala iti ulona, dua iti tian ken maysa pay iti barukong daytoy.
Nasarakan iti nakapasamakan ti krimen dagiti fired cartridges ti cal. 45 a paltog.
Kabayatanna, inaklon ti manang ti biktima a ni Rosalinda Estrada a nakigtotda idi nadamagda ti napagteng ti kabsat daytoy agsipud ta awan met ti nadamdamagda a nakasinnupiatna.
