LA UNION – Arestado iti maysa a 27-anyos a Filipino-American a ni Judd Sanson a maipagarop a konektado iti Jihadist terror group idiay New York City, USA.
Naidatag ti suspek iti Queens Criminal Court idiay New York idi Lunes.
Segun kenni Office of Queens District Attorney Melinda Katz, inarestar dagiti police officers ni Sanson iti maysa a traffic stop idi Miyerkules, Hunyo 12 ken naaktuan nga armado ti delikado nga armas iti lugan na nga addaan ti obscured a plaka.
Kabayatanna, dinipensaan ti abogado na ni Sanson a ni Thomas Michael Montella iti sango ti media iti uneg ti courtroom, a segun kenkuana, saan a patas a mangaramid ti konklusiyon iti kaso ti kliyente na nu maiparang iti publiko iti rupa na, idinto a saan pay a napaneknekan dagiti alegasyon ken awan pay ti naidatag nga ebidensiya.
Ngem dagus nga imbasura ti ukom iti panagkedked ni Montella.
Nakatuding nga iruar ti grand jury nu adda naan-anay nga ebidensiya para iti trial ti criminal charges ni Sanson ket ingkaso, sumango manen iti korte ni Sanson inton Hulyo 9.
