LA UNION – Nasurok dua a bilyon a pisos a balor ti shabu iti kinumpiskar dagiti anti-narcotics operatives iti nagsina nga operasyon idiay Pozorrubio, Pangasinan ken Poro, San Fernando City, La Union idi kalman, Agosto 12.
Uppat a tattao iti immuna nga inaresto ti Philippine Drug Enforcement Agency (PDEA) iti maysa a pagtaengan idiay ili ti Pozorrubio, Pangasinan agarop alas 11:30 idi bigat kalman.
Kabilang kadagiti uppat a naaresto iti maysa a Chinese national a nabigbig laeng iti nagan nga alyas “James” ken agserserbi a lider ti grupo.
Iti sabali pay nga operasyon ket naisayangkat iti makunkuna a safehouse ti grupo iti Barangay Poro, San Fernando City, La Union agarop alas 12:30 idi aldaw kalman.
Nagresulta ti buy bust operation dagiti anti-narcortics operatives iti pannaka-kumpiskar iti aganay 40 kilograms ti maipagarop a shabu, mapatta-patta nga agbalor ti nasurok P272 million.
Nakumpiskar pay iti marked money wenno boodle moneyt a P3-million, cellular phones, walkie talkie, pulling system a maus-usar iti panang-guyod dagiti kemikal manipud iti kabaybayan, naduma-duma nga identification cards, ken dokumento.
Dagiti iligal a droga a kinumpiskar dagiti otoridad ditoy La Union ket nabalkot iti kas ti chinse tea.
Iti anti-illegal drug operation ditoy siyudad ti San Fernando ket indaulwan ti PNP Drug Enforcement Group-Special Operations Units (PDEG-SOUs) ken La Union Provincial Drug Enforcement Unit (PDEU) kadwa iti dadduma pay a law enforcement agencies.
Dagiti suspek ket agtaltalinaed iti custodial facility ti PDEA ken sumangsango dagitoy iti kaso nga adda pakainaigan na iti panaglabsing iti RA 9162 wenno Comprehensive Dangerous Drugs Act of 2002.
Kinuna ni PDEA Deputy Director General Greg Pimentel, a nalawa iti operasyon ti grupo manipud Region 1, Region 3, 4 ken Central Visayas.
Segun pay kenni Pimentel a tallo a bulan a plinano da iti nasao nga operasyon.
Dackel met iti pammati ni PDEA Director General Wilkins Villanueva a maysa kadagiti naarestar da ket source wenno pagtataudan ti iligal a droga a maipagarop nga agiwar-waras iti intero a pagilian.
Nu ibasar iti record, daytoy iti maibilang a kadackelan a nakumpiskar nga iligal a droga iti pakasaritaan ti La Union.
Maipalagip nga idi July 09, 2008 naiduskubre iti maysa a shabu drug laboratory idiay Barangay Bimmotobot Naguilian La Union a nakakumpiskaran iti aganay P27 million a balor iti raw chemicals ken equipments a maus-usar iti panagaramidan ti shabu.
