Binabalaw ni Israeli Prime Minister Benjamin Netanyahu ti panangiruar ti International Criminal Court ti arrest warrant kontra kenkuana.
Kinunana a ti nadakamat nga addang ket “politically biased” ken awan ti serserbi na.
Innayon na pay a maysa daitoy a nalawag a mapulpulitika ti ICC gapo ta saan da a makitkita nga ti agpayso a biktima ket iti Israel.
Impasiguro ni Netanyahu nga saan da nga agpaapekto ken agtultuloy iti panangisalakan na kadagiti Israelita agingga malpas ti gera.
Kabayatanna, pinagyamanan met ti Hamas iti ICC gapo ti nasao nga warrant of arrest kontra kenni Netanyahu nu sadino inawagan daitoy nga addang a wagas tapno naan-anayen a magun-odda iti hustisya.
Kinontra met ti White House ti inaramid ti ICC gapo ta awan met ti hurisdiksyon da iti dayta ken pinapartak da pay iti panangiyuswat ti warrant.
Inawagan met ni Canadian Prime Minister Justin Trudeau ti Israel nga irespeto laengen ti bilin ken umanamong iti international law ken uray ti pagilian a South Africa ken Jordan ket adda met iti agpada a sentimiento iti isyu.
Kabayatanna, mamati met ni European Union Foreign Policy chief Josep Borrell nga iti ICC warrants ket saan a political ken daitoy ket asken nga irespeto ken ipatungpal.
Iti sabali a bangir ket naragsakan met ti Amnesty International iti panangiruar ti ICC ti warrant of arrest kenni Netanyahu ken kinuna nga adda panagrang-ay iti hustisya kontra kadagiti responsable kadagiti war crimes ken crimes against humanity idiay Palestine uray pay idiay Israel.
Maipalagip a nangiruar ti warrant of arrest ti ICC kontra kenni Netanyahu ken sigud a defense minister na a ni Yoav Gallant gapo kadagiti war crimes.
Mamati dagiti hukom ti ICC nga addaan da iti umdas nga ebedensiya nga dagiti opisyal ket responsable iti pannakatay dagiti adu nga sibilyan.
