Maysa a beterano a mammanday-linteg ti nangkuestion iti motibo iti hearing nga insayangkat ti House Committee on Legislative Franchises mainaig iti National Grid Corporation of the Philippines (NGCP).
Kinuna ni Cagayan de Oro Representative Rufus Rodriguez nga awan ti rason a maangay ti hearing gapu ta compliant met ti transmission grid operator kadagiti requirements.
Segun kenni Rodriguez, maibasar iti statement ti BIR ken ti House Ways and Means committee ket awan ti tax liabilities ti kompania.
Innayon ni Rodriguez nga uray ni Energy Regulatory Commission (ERC) chairperson Mona Dimalanta ket kinunana nga awan ti tax liabilities ti NGCP. Agtungtungpal pay ti NGCP iti 3% franchise tax-da.
Dinamag ni Roriguez iti komite no ti targetda ket ti panangwaswas iti 50-year franchise ti NCGP, isu a naisayangkat ti hearing.
Dinepensaan ni Rodriguez ti NGCP manipud iti kritisismo, kunana a saan a rumbeng a mapabasol iti lima a tawen a pannakataktak ti Mindanao-Visayas interconnection project gapu ta addaan dagitot iti sangsanguenna nga isyu, nangruna ti right of way kadagiti isyu ti golf course.
Nagyaman ni Rodriguez iti NGCP iti pannakaileppas ti proyekto ti Mindanao-Visayas interconnection project ken kinunana nga adu a kompania ti mangbangbangon kadagiti power generation plants idiay Mindanao gapu ta mabalinda itan ti aglako iti Luzon ken Visayas no adda sobra a kapasidadda.
Uray ni DOE Undersecretary Sharon Garin ket nagkuna a saan a rumbeng a maipabasol ti amin iti NCGP nangruna ta adu pay dagiti pending cases a masapul nga aprobaran ti ERC.
Iti biang ni Philreca Party-List Representative Presley C De Jesus, sinangaili na ti palawag ni Garin ket kinunana a saan a nainkalintegan nga ikabil amin a pammabasol kadagiti nataktak a proyekto iti NGCP.
Impaganetget ni De Jesus ti kinapateg ti panagtultuloy kadagiti proyekto ti transmission a panggep a mangpababa ti presio ti koriente ditoy pagilian.
