LA UNION – Natay iti maysa nga Overseas Filipino Worker (OFW), a maysa lawas pay laeng a simmangpet ken nakabakasyon ditoy Pilipinas manipud ballasiw taaw, kalpasan a maipagarop a na-aksidente iti nagluganan da a motorsiklo kadwa iti live-in partner na, iti kawatiwatan ti kalsada idiay Barangay Cabua-an, Balaoan, La Union.
Napasamak ti insidente, agaropalas 7:30 ti rabii idi Agosto 14, 2022.
Iti biktima ket managan Lilia Urbano, agtawen ti 31, residente ti Barangay Nagsabaran Sur, Balaoan bayat a ti nagmaneho ti motorsiklo ket managan Eduardo Galdonez, agtawen ti 40, residente ti Barangay Nagsabaran Norte ti nasao met laeng nga ili.
Maibasar iti report, natay ni Urbano kabayatan a maag-agasan idiay Balaoan District Hospital.
Iti interview ti Bombo Radyo La Union kenni Pol. Major Lawrence Ganuelas, agdama a chief-of-police ti Balaoan Police Station, kinuna na a base iti palawag ti driver a ni Galdonez, adda linisyan na a bato a daytoy metten ti nakaigapwan iti maipagarop a pannakai-pisok da iti kanal, iti akin-daya a paset ti kalsada.
Ngem segun kenni Major Ganuelas, agdu-dua da iti palawag ni Galdonez agsipudta maipagarop a saan nga agsusurot iti statement na, isutgapuna a kit-kitaenda iti posible a foul play iti napasamak a pannakatay ni Urbano.
Kinuna pay ti opisyal a sakbay iti napasamak nga insidente ket maipagarop nga adda iti saan a panagkinnaawatan dagiti aglive-in partner.
Naamwan dagiti otoridad a saan a nag-derecho ni Urbano iti balay ti live-in na idi simmangpet ditoy Pilipinas, nudiket nagawid iti balay ti nagannak na idiay Nagsabaran Sur, Balaoan, La Union.
Iti agdama, mangisay-sayangkat dagiti otoridad iti naun-uneg pay nga imbestigasyon iti maipagarop a napasamak nga aksidente.
Iti bangkay ti OFW ket naiyawid iti balay ti lalaki idiay Barangay Nagsabaran Norte.
