LA UNION – Agsagsaganan ti Overseas Workers Welfare Administration (OWWA) Regional Office-1 ti panagsangpet dagiti Overseases Filipino Workers nga agawid ditoy Ilocos Region ita a holiday season babaen ti Hatid-Sundo program.
Iti interview ti Bombo Radyo La Union kenni Family Welfare Officer Khristian Paul M. Maglaya,OWWA Regional Office-1, kinunana a sidadaandan a mangpasangpek kadagiti OFWs ita a holiday season.
Naipanamnama nga umdas dagiti bus a pagluganan dagiti OFWs agturong ditoy rehiyon.
Sigun pay kenni Maglaya, malaksid kadagiti miyembro ti OWWA ket mabalin a maka-avail ti Hatid-Sundo Program dagiti saan a miyembro nga OFW.
Impanamnama ti nadakamat nga ahensiya a ma-accomodate ken mapaawid a dagus dagiti OFWs iti bukodda a lugar a maiyannurot iti validity dagiti dokumento nga ikot dagitoy tapno makastrekda iti border control points.
Dagiti tulong nga ipapaay ti OWWA kadagiti OFWs babaen ti nadakamat a programa ket pakaibilangan ti libre a transportasyon, accomodation, taraon ken koordinasyon kadagiti local government units.
