Intuloy manen ti House Committee on Good Government and Public Accountability ti hearing mainaig iti panaggasto ti pondo ti Office of the Vice President (OVP) ken Department of Education (DepED), partikular ti Confidential Intelligence Funds (CIF) babaen ti panangidaulo idi ni VP Sara Duterte.
Impaganetget ni Manila Representative Joel Chua nga isu ti chairman ti komite ti karbengan dagiti umili a maamwan no anya ti nangibusbosan ti pondo manipud iti kaban ng bayan.
Pinaregta ni Chua dagiti dadduma pay nga empleado ti gobierno a karaman ken addaan pannakaammo kadagiti transaksion nga imimbestigaran ti kamara nga umasideg iti House Blue Ribbon Committee tapno ipalgakda no ania ti ammoda nu kasta ket maammuan ti kinapudno mainaig iti pannakaaramat dagiti pondo.
Impaganetget ti Kongresista a ti Kamara ti guardia ti pondo ti publiko, isu a maikari ti publiko a makaammo no sadino ti papapanan ti pondo ken no nasayaat ti pannakausar dagitoy.
