Nainget a kinondenar da House Assistant Majority Leader ken Lanao del Sur 1st District Representative Zia Alonto Adiong ken 1-Rider Party-list Representative Rodge Gutierrez ti pangta ni Bise Presidente Sara Duterte a mangkali ti bangkay ni dati a Presidente Ferdinand Marcos Sr., ken ibelleng daitoy idiay West Philippine Sea (WPS).
Segun kenni Representative Adiong, ipakpakita daytoy a desperado ken bastos ni VP Sara a mangipilpilit a mangabbong iti isyu na ti saan nga umiso a panangusarna iti pondo ti publiko.
Kinuna ni Adiong a ti rumbeng nga aramiden ni VP Sara ket sungbatanna dagiti alegasion kontra kenkuana imbes nga agaramid kadagiti nakababain nga aramid a mabalin met a maibilang a panangraut kadagiti cultural values ti pagilian.
Kinuna ni Congressman Gutierez, uray ania ti ar-aramiden ni VP Sara ket saan a makaabbong kadagiti kontrobersiya a sangsanguenna mainaig iti mapagduaduaan a pannakausar ti pondo manipud iti opisinana ken iti Department of Education (DepEd), nangruna no maipapan iti confidential fund.
