LA UNION – Mailukaten iti publiko, mangrugi inton bigat, Oktubre 29 agingga Nobyembre 1, 2022 iti Lingsat Public Cemetery ti Barangay Lingsat, San Fernando City, La Union.
Siento porsiento met itan a nadalus iti panteon dagiti minatay iti nasao a kamposanto.
Iti panagturong ti Bombo Radyo Newsteam iti Lingsat Public Cemetery, nakita a nadalusen iti aglawlaw, napabaro ti pintura ken letra iti nagan dagiti minatay kadagiti panteon.
Segun iti mangimatmaton iti sementeryo, mapalubosan aminen a tattao a sumrek iti kamposanto malaksid laeng kadagiti sumagmamano nga allagaden a siguden a maipat-patungpal, a kas iti maipawil ti agimet iti armas ken dadduma pay a natirad a bambanag, arak, baraha, ken sound system.
Dagiti dadduma a saanna a kayat ti makilinnet-let iti adu a tattao inton Martes ket nasapa da a bumis-bisita iti tanem dagiti pimmusay a cabagyan da, tapno sagutan iti sabong, kandila, ken kangrunaanna, kararag para iti kararua dagiti minatay.
