BR LA UNION – Nangiruar ti opisyal a waragawag iti St. Francis of Assisi Parish Cainta Rizal seknan iti nagwaras a video online ti maysa a padi ken aglaklako ti palaspas iti uneg ti arubayan ti simbaan idi Domingo Ramos, Abril 13.
Iti nasao a video, makita iti panangikkat ti padi iti aglaklako ti ramos iti arubayan ti simbaan.
Ngem inlawlawag ti simbaan a saan a kumpleto ti nasao a video ken nakakad-kadlaw nga adda pab-paboranna, agsipudta saan a naipakita dagiti pasamak sakbay a nangrugi ti video.
Maibasar iti waragawag ti parokya, agsapa pay idi binag-bagaan da dagiti aglak-lako a saan a maipalubos ti aglako iti uneg ti masakopan ti simbaan, kas panang-respeto iti sagrado a lugar ken maiyannurot iti allagaden ti parokya.
Iti likudan dayta, napasamak ti sinnukat ti sarita ken maipagarop a napagsasawan iti padi, banag a saan a naipakita iti nagwaras a video.
Mainaig ti daytoy, kimmiddaw ti tulong iti parokya kadagiti otoridad tapno naurnos ken nakapya a masungbatan iti sitwasyon.
Kimmiddaw metten iti parokya ti dispensar kadagiti nasair a deboto, natikaw, ken naklaat iti linaun ti video a napasamak iti napateg nga aldaw, idi Palm Sunday.
Immapela ti parokya iti publiko a saan a dagus nga husgaran base laeng iti naputed a video.
Nagpanawagan pay iti publiko a saanen nga i-share ti video agsipudta saan met a naipakita ti pakabuklan a pasamak.
