Maysa nga light helicopter nga addaan iti body number RP-C3424 ti nagsuwek iti waig idiay Sitio Arimung-mong, Barangay San Miguel, Guimba, Nueva Ecija, idi kalman Pebrero 1, 2025, agarop alas singko ti malem ken nagresulta ti pannakatay.
Nabigbig ti biktima a ni Julia Flori Monzon Po, 25-anyos, residente ti Marina Bay Homes, Asia World, Parañaque City.
Napasingkedan babaen kadagiti report a ni Po iti personal a piloto ni TV host ken senatorial candidate Willie Revillame.
Agarop alas nuebe ti rabii, binisita ni Revillame ti HM Mina Funeral Services idiay Pacac, Guimba, a nakaipapanan ti bangkay ni Po ken kamaudiananna ket naiyakar metlaeng sadiay Heritage Park, Parañaque.
Segun kenni Lieutenant Colonel George C. Calauad Junior, Hepe ti Guimba Police Station, nangisayangkat a dagos dagiti otoridad ti rescue and recovery operations kasaruno ti panagsuwek ti helicopter.
Kabayatanna, pinasingkedan met ti CAAP a nakaawat ti Philippine Aeronautical Rescue Coordination Center (PARCC) kadagiti multiple emergency alerts mainaig ti aksidente.
Impatulod ti Aircraft Accident Investigation and Inquiry Board (AAIIB) ni Retired Colonel Rhomel Ronda idiay crash site tapno madetermina ti pakaigapuan ti pasamak.
Kasaruno iti dayta ket intuloy met dagiti otoridad nga i-secure ti crash site kabayatan a maiganganwat ti imbestigasyon ken recovery operations.
