Agtaltalinaed a nababa ti presio ti kamatis iti merkado publiko idiay Pasay kalpasan ti panangngato daitoy iti agingga P400 kada kilo kadagiti dadakkel a merkado sadiay Metro Manila.
Kagiddan ti panangipakaammo ti Philippine Statistics Authority (PSA) iti panagngato ti inflation rate wenno ti kapartak ti presio dagiti tagilako a dimmanon iti 2.9% manipud iti 2.5% idi Nobiembre napan a tawen.
Inwaragawag ti ahensia ti rate ti panagngato ti presio ti kamatis a ket 120% idinto a ngimmato met ti presio ti karne ti baboy, manok ken dadduma pay a taraon.
Segun kadagiti aglaklako iti nateng, saanda a maipangato ti presio agsipud ta matumal paylaeng ti tagilako manipud idi Disiembre, ket no ngumato kunada, awan ton ti gumatang kadakuada.
Kadkadlaw pay ti panagbaba ti presio ti sumagmamano a nateng iti merkado publiko idiay Pasay nga agarop P20 manipud iti P80.
P70 itan ti kada kilo ti repolio manipud iti sigud a P120 kada kilo; P140 laeng itan ti kada kilo ti carrots, ken P40 ti kada kilo ti sayote.
Karaman pay a bimmbaba ti sibuyas, kalamansi, bell pepper ken siling labuyo idinto a nagtalinaed met ti presio ti bawang.
Ngimmato met iti P20 agingga P40 ti presio ti tunggal kilo ti tarong ken parya.
Mainaig iti daytoy, kinuna ni Agriculture Assistant Secretary Arnel de Mesa a nakaro ti pannakaapektar dagiti plantasion ti kamatis gapu iti bagyo.
Gapu iti daytoy, namnamaen nga agtalinaed a nangato ti presio ti kamatis agingga iti ngudo ti Enero, 2025.
Kabayatanna, nagpangato met iti P40 ti presio ti sumagmamano a karne ti baboy ken manok, idinto a nagtalinaed a natalged ti presio ti bagas, a P42 (local) agingga iti P65 (imported) iti merkado publiko idiay Pasay.
