LA UNION – Saan a rumbeng a paglalangayan iti social media babaen ti panagaramid ken panag-post iti video a saan makaay-ayu ken mangipak-pakita ti saan a nasayaat a kababalin.
Maysa laeng daytoy iti nagbalin a reaksiyon ni Ms. Arlyn Bambico, agdama a Principal iti San Fernando South Central Integrated School, seknan iti viral video iti maysa a maipagarop a teacher nga agung-unget kadagiti estudyante na bayat a naka-live stream iti TikTok.
Kinuna na nga iti uneg ti 31 a tawen a kaadda na iti academe, saanna a nagustuan iti inaramid ti makunkuna a teacher, agsipudta aglaaw-laaw ken nagisawang kadagiti saan a makaay-ayu a sarita a pananglait ken panang-tagibassit kadagiti estudyante.
Nupay kasta, nalidem pay laeng para kenni Bambico nu pudno nga adda iti sangwanan dagiti estudyante na iti viral teacher ken nu anya a grade wenno tukad dagiti ung-ungtanna nga estudyante.
Ngem nu bilang man pudno kunana, maysa daytoy a panaglabsing iti existing policies ti Departamento ti Edukasyon ken masapol nga amin ket agbalin a responsible social media user.
