LA UNION – Inruar ni Sen. Sherwin Gatchalian iti kopya ti maysa a da-an a pasaporte ken ID ti maysa a Guo Hua Ping a simrek ditoy Pilipinas idi Enero 12, 2003 wenno 21 a tawenen ti napalabas, a posible a daytoy met laeng ni Bamban Mayor Alice Guo.
Segun kenni Gatchalian, ni Guo ket simrek ditoy pagilian idi agtawen laeng ti 13 .
Iti pudno kunana a birthday ni Guo ket August 31, 1990 maibasar kadagiti dokumento nga impaay ti Board of Investments manipud pamilya Guo idi nag-aplay dagitoy para iti Special Resident Visa (SIRV) ken iti Bureau of Immigration.
Innayon ni Gatchalian a ti nagan ti ina ni Guo a nakarehistro iti dokumento ket Lin Wenyi.
Maipalagip nga idi simmango ni Guo idiay Senado, tinakderan na a maysa a Pilipina iti ina na, managan Amelia Leal, a maipagarop a sigud a katulong ti ama na.
Immunan nga imbaga ni Gatchalian a mabalin a paneknekan dagiti taga- Valenzuela a makaam-ammo kenni Guo a ni Lin Wen Yi ti ammo da nga ina ti mayor idi a ti pamilya Guo ket agnanaed pay laeng iti nasao a siyudad.
Nagbalin a kontrobersyal ni Guo kalpasan a mairaman kadagiti ilegal nga aktibidad ti POGO ditoy pagilian.
Nagbalin pay a kuwestyunable iti kinatao na kalpasan a pagdudua-an iti pudno a citizenship na, ken awan pulos malagip na iti panagubing na, malaksid a dimmackel iti maysa a farm idiay Tarlac.
